بحال موسى-بحال عيسى

أفريقيا بلوس ميديا/ تحرير: محمد بنهيمة 

سمح لينا آ بنادم راك تورقتي وليتي كتضرب و تزگل..كتحاول تلعب بأبناء الوطن وكتحرض شي على شي، كيفاش أبناء الريف وكيفاش قلتي أن الحموشي ميقدرش عليهم وعلاش كتبغي تشعل العافية… 

علاش ياكما محملتيش موسى يدير عرس، وعلاش شديتي لعرس من الجهة لي شاراك.. حيث تزوجتي بلا ما تدير العرس.. وعلاش لي عندو رزقوا من حقوا يدير عرس غير يكون كلشي قانوني..ايلا كان هاد موسى مخالف را البلاد فيها قانون…و القانون كيسري على موسى و عيسى و فلان و علان و فرتلان..كلشي بحال بحال.. را لي دار الذنب يستاهل العقوبة..انا بعدا لي عارف را تفتح تحقيق على التجاوزات لي كانت في داك العرس و كانوا اعتقالات و انتهى الكلام و هدشي را داز عليه سيمانة..وانت عاد طفات عليك الشمعة نضتي شديتي الموضوع من ودنو وركبتي على رجلو باش تفرغ السم و الحقد ديالك ودير الفتنة بين ولاد الوطن ، لمغاربة رجال وريافة رجال وجزء لا يتجزأ من الوطن والريف راه بلادنا ، واش في خبارك أن أحسن وجهة للمغاربة في الصيف هي الريف لأنها جميلة وناسها أجمل والشواطئ ديالها منعاودش ليك..الأمن و الأمان.

واخا أ بنادم نمشي معاك على قد عقلك دابا موسى دار عرس “أسطوري“ لي أنا شخصيا كنشوف من حقو، كيف ما من حق أي مغربي، يتبرع نهار زواجو..فين المشكل عندك ومازال كنقول ليك غير يحترم القوانين و ايلا كان هاد موسى مخالف را البلاد فيها قانون و لي فرط يكرط..وهاذ الشي مكيعنيش أن زغنغن كلشي لباس عليه و لا فيها السيبة ولا لي بغا يدير شي حاجة مخالفة القانون يديرها..

وسي را البلاد فيها قانون وحاضينها ماليها.. واش في خبارك أن ريافة مغاربة و بحالهم بحال جميع المغاربة، اشنو بغيتي تقصد بأن الريافة لباس عليهم والله يسهل عليهم راه الرزاق الله و اش بغيتي تقصد بلي هوما خارج القانون..را بحالهم بحالنا كاملين كيسري علينا نفس القانون.

غير متركبش على هاذ الشي و تبدا تحرض شي على شي، حيث ما حملتيش الاستقرار لي كتنعم به لبلاد -انت أصلا ما حامل حتى راسك- وكتقول الأمن ميقدرش على ريافة، الله ينعل ليما يحشم..و شكون قالها ليك أ بنادم شوف لكنتي تابع لشي جهة وعينك غير في الحموشي، دار الحموشي مشا الحموشي وووو راك غادي تبقا حتى تسطى وتحماق أصلا علاش مكتهضرش على الباطرون الإداري ديال الحموشي، علاش مكتهضرش مثلا على الفتيت عينك غير في الحموشي حيث الجهة لي دافعاك عينها في الحموشي حيث خنقهم وقهرهم..

وااا بنادم بصحة ريافة ويديروا العرس غير يكون بقواعدو و في إطار الضوابط المعمول بها..راه ايلا دَّارْ أي عرس في أي منطقة في المغرب خارج الضوابط القانونية را غادي يسري عليه ما سرا على عرس موسى.. هاذ موسى ايلا عطاه الله يدير العرس لي بغا ونفرحوا معاه و نباركو ليه، غير ما يخالفش القوانين و يخضع -بحالو بحال أي مغربي- للضوابط المعمول بها را لي فرط يكرط واخا يكون من عائلة الحموشي و دخلها لراسك..الحموشي ما معاهش اللعب..قيد هادي عندك.

سير خلي عليك ولاد الوطن راه خوت وتجمعنا راية واحدة وكلشي تحت راية واحدة وعاشت المملكة المغربية ولا عاش من خانها…..ولنا عودة في الموضوع